Azərbaycan, Bakı, 27 dekabr /Trend, müxbir E.İsmayılov/
Qaradağ rayonunda yeni neft emalı zavodunun tikintisi üzrə layihənin texniki iqtisadi əsaslandırması (TİƏ) və konsepsiya gələn il tam hazır olacaq. Bu barədə bazar ertəsi ARDNŞ prezidenti Rövnəq Abdullayev deyib.
"Bizim mütəxəssislər bu layihə üzərində işləyirlər. Artıq gələn il konsepsiya və texniki iqtisadi əsaslandırma hazır olacaq. Bu, Azərbaycanda yeni neft emalı zavodunun və qaz-kimya qurğularının yaradılması deməkdir", - Abdullayev qeyd edib.
Onun sözlərinə görə, ölkədə qaz hasilatının artırılması şəraitində qaz emalı nəticəsində əldə ediləcək keyfiyyətli məhsul məsələsi gündəmdədir.
Yeni neft-kimya kompleksində Azərbaycanın karbohidrogen resurslarının, xüsusən təbii və səmt qazının dərin emalı, neftin neft məhsulları, avtomobil yanacağı və sürtkü yağlarının alınması üçün emalı, eləcə də neft və qaz emalı məhsulları bazasında yeni neft-kimyanın inkişafı nəzərdə tutulur.
Layihə kompleks nəzdində elektrik stansiyasının tikintisini də nəzərdə tutur. İlkin hesablamalara görə, kompleksdə qazın emal həcmi ildə 40 milyard kubmetrə qədər, neft emalının gücü (sonrakı 40 ilə perspektivlə) isə təxminən 15 milyon ton təşkil edəcək.
Kompleksin 2018-2019-cu illərdə tam gücü ilə işləyəcəyi nəzərdə tutulur. İlk növbədə, qaz emalı və neft-kimya müəssisələrinin tikintisinə başlanılacaq. Kompleksin daxili tələbatını ödəmək üçün tədricən istilik enerjisi mərkəzinin tikintisi aparılacaq.
Hazırda Azərbaycanda iki neft emalı zavodu var. Bunlar Heydər Əliyev adına Bakı Neft emalı Zavodu və "Azərneftyağ" NEZ-dir. İki NEZ-in ümumi gücü ildə 20 milyon ton təşkil edir.
