Azərbaycan, Bakı, 10 yanvar /Trend/
2010-cu ildə ARDNŞ-nin (Azərbaycan Respublikası Dövlət Neft Şirkəti) Kulevi neft terminalı 3,6 milyon ton neft məhsulları qəbul edib. Bu göstərici 2009-cu ilin göstəricisindən 56 faiz çoxdur. Bu barədə bazar ertəsi ARDNŞ-dən məlumat verilib.
Məlumatda deyildiyi kimi, ötən ilin dekabr ayında terminal 317 864 ton neft və neft məhsulları qəbul edib. Göstərilən dövr ərzində terminal vasitəsilə dünya bazarına 415 449 ton neft və neft məhsulları ötürülüb.
Cari ilin iyul ayından terminal "Tengiz" yatağından Qazaxıstan neftinin ötürülməsinə başlayıb. Bu dövrə qədər terminal neft məhsullarının ötürülməsi ilə məşğul olub.
Kulevi terminalı istismara 2008-ci ilin mayında verilib. Neft məhsullarının faktiki olaraq boşaldılmasına iyundan başlanılıb. Terminalda yüklərin yüklənib-boşaldılmasının ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsünün tikintisi nəzərdə tutulub. Müəssisədə liman, dəmiryol stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmiryol estakadalarında eyni vaxtda 168 vaqon-sisternin boşaldılması mümkündür.
