Azərbaycan, Bakı, 11 mart /Trend, müxbir E.İsmayılov/
2010-cu ildə dövlət büdcəsindən alternetiv və bərpa olunan enerji mənbələrinin inkişafı çərçivəsində "Azərenerji" SC-yə (Azərbaycanda elektrik enerjisinin istehsalı və paylanması) 15 milyon manat məbləğində vəsait ayrılıb. Bu barədə hökumətin ötən ilin yekunları üzrə hesabatında deyilir.
Məlumata görə, vəsait ölkənin müxtəlif regionlarında ümumi gücü 16,3 meqavat olan 10 kiçik su elektrik stansiyasının tikintisi üzrə işlərin davam etdirilməsi üçün ayrılıb.
Ötən il gücü üç meqavat olan "Göyçay-1", 1,5 meqavatlıq "Balakən-1" və bir meqavatlıq "Qusar-1" kiçik su elektrik stansiyalarının təməli qoyulub.
Hesabatda deyilir ki, bu elektrik stansiyalarının 2011-ci ilin birinci yarısında istismara verilməsi planlaşdırılır.
Həmçinin 2010-cu il dövlət büdcəsindən Naxçıvan Muxtar Respublikasındakı "Biləv" su elektrik stansiyasının tikintisinin başa çatdırılması üçün 10 milyon manat vəsait ayrılıb. Gücü 22 meqavat olan bu stansiya 2010-cu ilin ikinci yarısında istismara verilib.
