Azərbaycan, Bakı, 17 mart /Trend, müxbir E.İsmayılov/
TRACECA (Avropa-Qafqaz-Asiya) nəqliyyat dəhlizi çərçivəsində multimodal daşımaların inkişafına dair sazişin qüvvəyə minməsi dəhliz çərçivəsində yüklərin nəqlinə və sərnişinlərin daşınmasına müsbət təsir göstərəcək. Bu barədə TRACECA-nın Azərbaycandan olan milli katibi Akif Mustafayev deyib.
Multimodal daşımaların inkişafına dair saziş 2009-cu ildə imzalanıb və Azərbaycan Parlamenti tərəfindən ötən həftə təsdiq edilib.
Onun sözlərinə görə, parlamentin bu sazişi ratifikasiya etməsi müsbət faktdır. "Azərbaycan bu sazişi ratifikasiya edən ölkələr sırasındadır və bu onun qüvvəyə minməsi üçün kifayətdir", - Mustafayev bildirib.
Mustafayevin sözlərinə görə, bu sazişin imzalanması zamanı təqdim edilən düzəliş hissəsi var. Buna əsasən, dəhliz çərçivəsində Azərbaycan vasitəsilə yüklərin Ermənistana tranzitinə və ya tədarükünə imkan verilmir.
Milli katib onu da qeyd edib ki, Azərbaycan TRACECA-nın səkkiz hökumətlərarası konfrans zamanı imzalanan bütün saziş və sənədlərini ratifikasiya edən yeganə iştirakçı ölkəsidir.
"Bu sənədlərin ümumi sayı orta hesabla 10-dur", - Mustafayev qeyd edib.
Hazırda TRACECA-nın iştirakçı dövlətləri Azərbaycan, Bolqarıstan, Gürcüstan, Qazaxıstan, Qırğızıstan, Ermənistan, Moldova, Rumıniya, Tacikistan, Türkmənistan, Türkiyə, Ukrayna və İrandır.
