Azərbaycan, Bakı, 30 mart /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının texniki operatoru olan Böyük Britaniyanın BP və Danimarkanın "Maersk Drilling" şirkətləri Heydər Əliyev adına qazma qurğusunun yatağın genişmiqyaslı işlənməsinə cəlb edilməsi müddətini razılaşdırırlar. Bu barədə çərşənbə günü Trend-ə neft-qaz bazarındakı mənbə deyib.
"Qurğunun işlərə cəlb edilmə müddəti tərəflər arasında müqavilə imzalanana qədər dəqiqləşdiriləcək", - mənbə bildirib, lakin müqavilənin mümkün imzalanma müddətini dəqiqləşdirməyib.
Neft-qaz bazarındakı mənbənin əvvəllər dediyi kimi, Heydər Əliyev adına qazma qurğusu "Şahdəniz" yatağındakı işlərə 2012-ci ildə deyil, cari ilin dördüncü rübündə cəlb edilə bilər.
Əvvəllər neft-qaz bazarındakı digər mənbənin dediyinə görə, "Şahdəniz"in genişmiqyaslı işlənməsi çərçivəsində nəzərdə tutulan çoxlu quyuların qazılması üçün bir "İstiqlal" qazma qurğusu kifayət etmir. Məhz buna görə də BP Heydər Əliyev adına qurğunu yataqdakı işlərə cəlb etmək niyyətindədir. "Şahdəniz"in genişmiqyaslı işlənməsi çərçivəsində iki dəniz platforması quraşdırılacaq və 30 sualtı quyu qazılacaq.
İşlənmənin birinci mərhələsi çərçivəsində yataqda ən yüksək hasilat həddi 8,6-9 milyard kubmetr səviyyəsində proqnozlaşdırılır. Proqnozlara əsasən, yatağın işlənməsinin ikinci mərhələsində burada qaz hasilatının həcmini ildə 24 milyard kubmetrə qədər artırmaq olar.
Yatağın ehtiyatları 1,2 trilyon kubmetr qaz qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
Hazırda Heydər Əliyev adına qurğudan Xəzərin Azərbaycan sektorundakı "Abşeron" perspektiv strukturunun kəşfiyyatına və işlənməsinə dair yeni müqavilə çərçivəsində birinci kəşfiyyat quyusunun qazılması aparılır.
Mənbənin sözlərinə görə, quyunun qazılması normal rejimdə davam edəcək və cari ilin payızına başa çatmalıdır.
ARDNŞ geoloqlarının qiymətləndirmələrinə görə, "Abşeron" strukturunun ehtiyatları 300 milyard kubmetr qaz və 45 milyon ton kondensat təşkil edə bilər.
"Abşeron" bloku Bakının 100 kilometrliyində suyun 500 metr dərinliyində yerləşir.
"Abşeron" layihəsinin iştirakçıları: ARDNŞ - 40 faiz, Fransa şirkətləri "Total" - 40 faiz və "Gaz De France Suez" - 20 faiz.