Azərbaycan, Bakı, 11 aprel /Trend, müxbir E.İsmayılov/
Aprelin 11-nə olan məlumata görə, ARDNŞ (Azərbaycan Respublikası Dövlət Neft Şirkəti) Azərbaycanın yeraltı qaz anbarlarından hər gün martın 30-dakı 12 milyon kubmetrə qarşı 4 milyon kubmetr qaz götürür. Bu barədə bazar ertəsi ARDNŞ-dəki mənbə məlumat verib.
Götürülən qaz həcmlərinin azalması hava şəraitinin yaxşılaşması və qaza tələbatın azalması ilə bağlıdır.
Azərbaycan iki - Qaradağ və Qalmaz yeraltı qaz anbarına malikdir.
Mənbənin sözlərinə görə, hazırda qaz yalnız Qalmaz yeraltı qaz anbarından götürülür. Qaradağ qaz anbarından qazın götürülməsi dayandırılıb.
Hazırda qaz anbarlarında qalan qazın ümumi həcmi 1,27 milyard kubmetrə yaxındır. Bunun 705,24 milyon kubmetri Qalmaz yeraltı qaz anbarının, 563,94 milyon kubmetri isə Qaradağ qaz anbarının payına düşür.
Plana görə, yeraltı anbarlardan qazın götürülməsi aprelin 15-dək tam dayandırılmalıdır.