Azərbaycan, Bakı, 21 aprel /Trend, müxbir E.İsmayılov/
Gələn ilin sonunadək Sənaye və Energetika Nazirliyinin Alternativ və Bərpa Olunan Enerji Mənbələri üzrə Dövlət Agentliyi 2020-ci ilədək Azərbaycanda alternativ enerji mənbələrinin inkişafı proqramının hazırlanmasını başa çatdırmağı planlaşdırır. Bu barədə cümə günü Trend-ə agentlik rəhbərinin müavini Cəmil Məlikov bildirib.
Onun sözlərinə görə, proqramın hazırlanması üzrə işlər mərhələli şəkildə aparılacaq və Azərbaycanda alternativ və bərpa olunan enerji mənbələrinin qısamüddətli, ortamüddətli və uzunmüddətli inkişaf ssenarisindən ibarət olacaq.
Hazırda podratçıların seçimi üzrə tender proseduru aparılır. Onlar sonralar proqrama daxil olunacaq alternativ enerji mənbələrinin ayrı-ayrılıqda inkişaf istiqamətlərini işləyib hazırlayacaqlar.
Məlikovun sözlərinə görə, artıq dörd podratçı seçilib, onlardan ikisi ilə müqavilələr imzalanıb. Daha iki podratçının seçilməsi də nəzərdə tutulub.
Proqram alternativ və bərpa olunan enerji mənbələrinin bütün inkişaf istiqamətlərini, habelə külək, Günəş enerjisinin regenerasiyasını, kiçik su elektrik stansiyalarının tikintisini və digər istiqamətləri nəzərdə tutur.