Azərbaycan, Bakı, 13 iyun /Trend, müxbir E.İsmayılov/
2013-cü ilin iyulunda ARDNŞ (Azərbaycan Respublikası Dövlət Neft Şirkəti) Ələt qəsəbəsində yeni gəmiqayırma zavodunu istismara verməyi planlaşdırır. Bu barədə şirkətdən bildirilib. Zavodun tikintisinə ötən ilin avqustunda başlanılıb.
Yeni gəmiqayırma zavodu Azərbaycan və Xəzəryanı ölkələrin gəmilərə olan tələbatını ödəməyə imkan verəcək. Lakin, ilk növbədə, müəssisədə istehsal olunacaq gəmilər Azərbaycanın öz dəniz donanmasının yenilənməsinə yönəldiləcək.
Şirkətin məlumat materiallarında deyildiyi kimi, yeni zavodun yerləşəcəyi ərazi 880 min kvadrat kilometr, qapalı istehsal sahəsi 75 min kvadrat metr, körpülərin uzunluğu 1300 metr təşkil edəcək.
Mənbə bildirib ki, ilkin mərhələdə zavodda bir min nəfər işçi çalışacaq, dörd-beş ildən sonra isə zavodun işçilərinin sayı 1700-2000 nəfər təşkil edəcək.
Zavodun tikintisinə qoyulan investisiyanın həcmi 450 milyon dollar təşkil edir.
"Bakı Gəmiqayırma Zavodu" MMC-nin yaradılmasına dair təsis müqaviləsini ARDNŞ prezidenti Rövnəq Abdullayev, Azərbaycan İnvestisiya Şirkətinin direktoru Əfqan İsayev və "Keppel" şirkətinin baş icraçı direktoru Tonq Çonq Xeonq imzalayıb.
Müqaviləyə əsasən, müəssisədə pay bölgüsü bu şəkildə bölüşdürüləcək: ARDNŞ - 65 faiz, AİŞ - 25 faiz, "Keppel" - 10 faiz."Keppel" sonrakı 3 il ərzində öz payını daha 10 faiz artırmaq hüququnu da əldə edib.
Zavodun gücü ildə 25 min ton dəmir konstruksiya təşkil edir. Zavod hər il m15 min ton dedvetyə malik 4 tanker və ya 70 min ton dedveytli iki tanker istehsal edə biləcək. Eləcə də zavod ildə dörd gəmi və yedək gəmisi istehsal edə və müxtəlif təyinatlı 80-100 gəmi təmir edə biləcək. Layihənin əsas məqsədi Xəzər dənizində tələbatı təmin etmək üçün lazımi gəmilərin tikintisidir.
