Azərbaycan, Bakı, 19 iyul /Trend, müxbir E.İsmayılov/
İyulun 1-nə olan məlumata görə, Xəzərin Azərbaycan sektorundakı "Şahdəniz" qaz-kondensat yatağının işlənməsi layihəsinin həyata keçirilməyə başladığı vaxtdan Dövlət Neft Fonduna (ARDNF) 755,7 milyon dollar vəsait daxil olub. Bu barədə Trend-ə Fonddan bildiriblər.
"2007-ci ildən başlayarq və bu ilin iyulun 1-i üzrə Fonda "Şahdəniz" layihəsindən 755,7 milyon dollar vəsait daxil olub", - ARDNF-dən bildiriblər.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
Şahdəniz" yatağının işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə 25 milyard kubmetrədək çatdırmaq mümkün olacaq.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LUKoil" - 10%, TPAO - 9%, ARDNŞ - 10%.