Azərbaycan, Bakı, 12 sentyabr /Trend, müxbir E.İsmayılov/
Azərbaycan öz qazını Avropaya tədarük edəcək boru kəmərləri layihələrindən birini təkliflərdəki bir sıra həll olunmamış məsələlər olduğu üçün seçə bilmir. Bu barədə Trend-ə bazar ertəsi ARDNŞ-nin yüksək vəzifəli işçisi deyib.
"Hər üç boru kəməri layihəsi - Nabukko, TAP və ITGI - öz təkliflərini verib və onlar hazırda müzakirə olunur. Bununla yanaşı, Azərbaycan tərəfi onların investisiya və tikinti müddəti, uzunluqları, qazın həmin layihələrin keçəcəyi ölkələrin ərazilərindən nəqli tarifləri barədə dəqiq məlumat tələb edir", - ARDNŞ rəsmisi bildirib.
Onun sözlərinə görə, buna uyğun olaraq layihə seçimi "Sahdəniz", "Abşeron" yataqları kimi digər qaz layihələrinin həyata keçirilməsi üçün cəlb edilməli olan investisiya həcmlərinə də təsir göstərəcək.
Eyni zamanda, o bildirib ki, Azərbaycanda qaz hasil edən tərəfdaşlar boru kəməri layihələrinin tikintisi çərçivəsində hər hansı bir vaxt məhdudiyyəti qoymur.