Azərbaycan, Bakı, 12 mart /Trend, müxbir E.İsmayılov/
2012-ci ilin ikinci yarısında "Azərenerji" ASC Azərbaycanda alternativ enerjinin inkişafı çərçivəsində səkkiz kiçik su elektrik stansiyasını (SES) istismara verəcək. Trend-in məlumatına görə, bu barədə "Nazirlər Kabinetinin 2011-ci ildə fəaliyyəti haqqında hesabat"da deyilir.
Dövlət İnvestisiya Proqramı çərçivəsində alternativ enerji güclərinin yaradılması üçün 15 milyon manat ayrılıb. Bu vəsaitlər hesabına ötən il ümumi gücü 11,7 meqavat olan səkkiz kiçik SES-in tikintisi üzrə işlər həyata keçirilib.
Bunlar aşağıdakı elektrik stansiyalarıdır: "Göyçay" (3,5 meqavat), "İsmayıllı-1" və "İsmayıllı-2" (hər biri 1,6 meqavat), "Qusar-1" (1,1 meqavat), "Astara-1" (0,5 meqavat), "Balakən-1" (1 meqavat), habelə "Oğuz-1" və "Oğuz-2" (hər biri 1,2 meqavat).
Hesabata əsasən, 2009-2011-ci illərdə dövlət tərəfindən alternativ və bərpa edilən enerji mənbələrinin inkişafına 30,4 milyon manat, habelə qrant şəklində 11,75 milyon avro ayrılıb.
