Azərbaycan, Bakı, 1 oktyabr /Trend, müxbir A.Axundov/
Azərbaycan Respublikası Dövlət Neft Şirkəti (ARDNŞ) Türkiyənin "Başkentgaz" qazpaylayıcı dövlət şirkətinin özəlləşdirilməsində iştiraka dair planlardan imtina edib. Bu barədə Trend-ə bazar ertəsi ARDNŞ-nin yüksək vəzifəli nümayəndəsi bildirib.
Ankara şirkətinin 100 faizlik özəlləşdirilməsini nəzərdə tutan tender sentyabrda elan edilib. Təkliflərin təqdim edilməsinin son tarixi 2012-ci il dekabrın 17-də başa çatır.
"Biz "Başkentgaz" üzrə tenderdə iştirak etməmək barədə strateji qərar qəbul etmişik", - mənbə vurğulayıb.
Türkiyənin Energetika və Təbii Resurslar Nazirliyi oktyabrda İGDAŞ (İstanbul) qazpaylayıcı şəbəkəsinin özəlləşdirilməsini nəzərdə tutan qanun layihəsini təsdiq edilməsi üçün parlamentə təqdim edəcək.
Mənbənin sözlərinə görə, ARDNŞ İGDAŞ-ın özəlləşdirilməsində iştiraka dair planlarını saxlayır.
"İGDAŞ özəlləşdirilməyə çıxarılan zaman bu prosesdə iştirak məsələsinə baxacağıq və qərar qəbul edəcəyik", - mənbə qeyd edib.
ARDNŞ Türkiyədə yeni neft emalı zavodunun tikintisinə hazırlaşır. Zavodun 2014-cü ildə istismara verilməsi planlaşdırılır.
"Türkiyədə yanacaqdoldurma məntəqəsinin əldə edilməsi şirkət üçün məqsəd deyil, biz Türkiyə bazarının bu sahəsinə daha geniş baxırıq. Biz neft emalı zavodunun tikintisi ilə bağlı praktiki olaraq işlərə başlamışıq. Türkiyədə neft məhsullarının pərakəndə satışı sisteminin yaradılması neft emalı üzrə zavodumuzun istismara verilməsi üçün lazımdır", - mənbə vurğulayıb.
