Azərbaycan, Bakı, 30 iyul /Trend, müxbir H. Vəliyev/
Ötən ilin nəticələri üzrə Azərbaycanda "Şahdəniz" yatağından qaz hasilatının həcmi təqribən 7,73 milyard kubmetr, kondensat hasilatının həcmi isə təqribən 16,1 milyon barel təşkil edib. Trend-in məlumatına görə, bu barədə bp-nin 2012-ci ili yekunlarına dair illik hesabatında deyilir.
Hesabata əsasən, hasilata başlandıqdan (2006-cı ilin sonundan) 2012-ci ilin sonunadək "Şahdəniz" yatağından daxili və xarici ixracatın həcmi 37,6 milyard kubmetr qaz, eyni zamanda 80 milyon barel kondensat olub.
Hazırda "Şahdəniz" yatağından potensial sutkalıq hasilat həcmi 27,3 milyon kubmetr qaz (tələbatdan asılı olaraq) və 55 min barel kondensat təşkil edir.
Ötən il "Şahdəniz" üzrə məcmu əməliyyat xərclərinin həcmi 269,3 milyon dollar olub. Əsaslı xərclər 1,1 milyard dollara çatıb. 2013-cü ildə təsdiq edilmiş əməliyyat xərcləri 222 milyon dollar, əsaslı xərclər isə 2,67 milyard dollar təşkil edəcək.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
