Azərbaycan, Bakı, 13 noyabr /Trend/
"Şahdəniz" qaz-kondensat yatağının işlənməsinin ikinci mərhələsinin dəyəri 25 milyard dollar qiymətləndirilir. Trend-in məlumatına görə, bu barədə BP şirkətinin (texniki operator) cari ilin 3 rübünün yekunlarına dair hesabatında deyilir.
Hesabatda qeyd edilir ki, 2013-cü ildə bu layihə çərçivəsində 1,7 milyard dollar xərcləmək planlaşdırılır.
Layihə üzrə yekun investisiya qərarı 2013-cü ilin dekabrında qəbul ediləcək, bu layihə çərçivəsində ilk qazın 2018-ci ildə əldə edilməsi planlaşdırılır.
Yatağın işlənməsinin ikinci mərhələsi çərçivəsində 16 milyard kubmetr qaz hasil etmək planlaşdırılır (I mərhələdə 9 milyard), bunun 6 milyard kubmetri Türkiyəyə və eyni həcmdə qaz Avropaya tədarük ediləcək.
Qeyd edək ki, "Şahdəniz" yatağının işlənməsi üzrə müqavilə 1996-cı il iyunun 4-də imzalanıb. Müqavilənin iştirakçıları aşağıdakılardır: BP (operator) - 25,5 faiz, "Statoil" - 25,5 faiz, NICO - 10 faiz, "Total" - 10 faiz, "Lukoil" - 10 faiz, TPAO - 9 faiz, ARDNŞ - 10 faiz.