Azərbaycan, Bakı, 13 yanvar /Trend, müxbir E.İsmayılov/
2014-cü ildə "Bahar" və "Qum Dəniz" yataqları blokunda kəşfiyyat, bərpa, işlənmə və hasilat üzrə PSA müqaviləsi çərçivəsində səkkiz yeni quyunun qazılması planlaşdırılır. Trend xəbər verir ki, bu barədə "Greenfields Petroleum Corporation"in saytında yerləşdirilmiş məlumatda deyilir.
PSA tipli müqavilə çərçivəsində "Bahar Energy" şirkətinin şəriki olan "Greenfields Petroleum Corporation" "Bahar" və "Qum Dəniz" yataqları blokunda kəşfiyyat, bərpa, işlənmə və hasilat üzrə "Bahar" yatağının operatorudur, həmçinin onun texniki məsləhətçisi rolunda çıxış edir.
Məlumatda deyilir ki, 2014-cü il ərzində hasilatın həcmlərinin artırılması üzrə işlər davam etdiriləcək ki, bu da yeni quyuların qazılmasını tələb edir.
Yanvarın 10-na olan məlumata görə, 90 gün ərzində müqavilə çərçivəsində neft hasilatının orta sutkalıq həcmi gözlənilən 6 944 barelə qarşı 6 962 barel təşkil edib.
ARDNŞ (Azərbaycan Respublikası Dövlət Neft Şirkəti) və "Bahar Energy" arasında PSA tipli müqavilə 2009-cu ildə imzalanıb.
Öz növbəsində, Azərbaycanın "Baghlan Group" özəl şirkəti "Bahar Energy"də 66,67 faizlik iştirak payına malikdir.
