Azərbaycan, Bakı, 3 fevral /Trend, müxbir E.İsmayılov/
"Azərenerji" ASC 2014-cü ilin sonunadək Bakıda "Şimal" Elektrik Stansiyasında ikinci buxar-qaz qurğusunun tikintisi üzrə işləri başa çatdrımaq niyyətindədir. Bunu bazar ertəsi Trend-ə ASC-dən deyiblər.
"Azərenerji"dən bildiriblər ki, hazırda ikinci enerji blokunun tikintisi üzrə işlər fəal şəkildə davam etdirilir: "Bütün səylər "Azərenerji"nin hazırkı iri layihəsinin həyata keçirilməsinə yönəldilib. Yeni obyekti il ərzində istismara vermək planlaşdırılır".
"Şimal" ES-in 409 meqavat gücündə olan ikinci buxar-qaz qurğusunun tikintisi Abşeron yarımadasının enerji təhlükəsizliyinin möhkəmləndirilməsi baxımından önəm kəsb edir.
Hazırda "Şimal" ES Bakı və Abşeronun elektrik enerjisinə olan təlabatını 25 faiz ödəyir. İkinci blokun inşası ilə bu göstərici 35-40 faizə çatacaq. İkinci enerji blokunun tikintisi Yaponiyanın "Toyo Engineering" şirkəti ilə bağlanmış müqavilə əsasında aparılır.
Qeyd edək ki, hazırda "Şimal" ES-də 400 meqavat gücündə bir buxar-qaz qurğusu var.