Azərbaycan, Bakı, 19 fevral /Trend, müxbir E.İsmayılov/
ARDNŞ-lə (Azərbaycan Respublikası Dövlət Neft Şirkəti) Rusiyanın "Transneft" şirkəti arasında Bakı-Novorossiysk boru kəməri ilə neftin daşınması üzrə yeni kommersiya sazişinin imzalanmasına baxmayaraq, Dövlət Neft Şirkəti Bakı-Tbilisi-Ceyhan neft kəməri ilə öz neftinin nəqlini davam etdirəcək. Bu barədə çərşənbə günü Trend-ə ARDNŞ-dəki mənbə məlumat verib.
Bakı-Novorossiysk boru kəməri ilə ARDNŞ-nin özünün, eləcədə birgə müəssisələr çərçivəsində quru yataqlardan hasil etdiyi neft nəql olunur.
2013-cü ildə ARDNŞ Bakı-Novorossiysk şimal boru kəməri ilə 2012-ci ildəki 2,06 milyon tona qarşı 1,75 milyon ton neft nəql edib. Lakin bir qədər əvvəl Rusiya tərəfi Bakı-Novorossiysk şimal boru kəməri ilə neftin nəqlinə dair hökumətlərarası sazişin dayandırılmasına qərar verib. Nəticədə 2014-cü il fevralın 15-dən əvvəllər şimal istiqamətində nəql olunan neft Bakı-Tbilisi-Ceyhan neft kəmərinə istiqamətləndirilib. Və ehtimal olunur ki, əgər razılaşma əldə olunmazsa, ARDNŞ-nin hər il Bakı-Novorossiysk kəməri ilə nəql etdiyi iki milyon tona yaxın neft Bakı-Tbilisi-Ceyhan neft kəməri ilə ixrac olunacaq. Bundan əlavə perspektivdə şirkət BTC ilə beş milyon tonadək əlavə neft həcmləri ixrac etmək fürsəti qazanacaq.
Mənbənin sözlərinə görə, imzalanmış saziş Bakı-Novorossiysk kəməri ilə bir il ərzində, yəni 2015-ci ilin fevralınadək Azərbaycan neftinin ixracını təmin etməyə imkan verəcək: "Bu, o demək deyil ki, ARDNŞ-nin Bakı-Tbilisi-Ceyhan neft kəməri ilə qərb istiqamətində neft ixracı dayandırılacaq. Bu neft həcmlərinin bir hissəsinin nəqli məhz BTC neft kəməri ilə həyata keçiriləcək".
ARDNŞ nümayəndəsinin sözlərinə əsasən, proqnozlara görə ilin sonunadək ümumilikdə ARDNŞ-nin hər iki istiqamətdə neft həcmlərinin nəqli 1,55 milyon ton təşkil edəcək ki, bundan da 1,02 milyon ton Bakı-Novorossiysk kəmərinin, 530 min ton isə Bakı-Tbilisi-Ceyhan neft kəmərinin payına düşəcək.
Onun sözlərinə görə, Bakı-Novorossiysk kəməri ilə nəqlin fevralın 21-dən sonra başlayacağı gözlənilir.
Dünən ARDNŞ-nin yayadığı məlumatda deyilir ki, Bakı-Novorossiysk boru kəməri vasitəsilə neft nəqlinin bərpa edilməsi üzrə uzunmüddətli danışıqlardan sonra ARDNŞ ilə Rusiyanın "Transneft" şirkəti arasında qarşılıqlı faydalı kommersiya şərtləri əsasında yeni müqavilə imzalanıb.
Rusiya ərazisi vasitəsilə neftin nəqlinin bərpası Azərbaycan neftinin dünya bazarlarına ixrac marşrutlarının daha da şaxələndirilməsinə imkan verəcək.
2008-ci ildən ARDNŞ Bakı-Novorossiysk boru kəmərinin operatorudur. Şirkət operatorluğu Azərbaycan Beynəlxalq Əməliyyat Şirkətindən (ВР başda olmaqla) alıb. Kəmərin uzunluğu 1147 kilometr təşkil edir: Azərbaycan hissəsinin payı 231, Rusiya tərəfiin isə 916 kilometrdir. Diametri 720 millimetrdir. Nəqlin layihə gücü gündə 120 min bareldir.