Azərbaycan, Bakı, 3 mart /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) Marketinq və iqtisadi əlaqələr idarəsi 2014-cü ilin yanvar-fevral aylarında Türkiyənin Ceyhan limanından 2,99 milyon ton neft ixrac edib. 2013-cü ilin eyni dövründə bu rəqəm 3,17 milyon ton təşkil edib.
Trend-in ARDNŞ-yə istinadən verdiyi məlumata görə, Dövlət Neft Şirkəti fevralda Ceyhandan 1,4 milyon ton neft ixrac edib. 2013-cü ilin müvafiq dövründə isə bu rəqəm 1,74 milyon tona bərabər olub.
ARDNŞ ötən il ümumilikdə Ceyhan limanından 19,75 milyon ton neft ixrac edib. 2012-ci ildə isə ixracatın həcmi 20,2 milyon ton olub.
Qeyd edək ki, neft Ceyhan limanına Bakı-Tbilisi-Ceyhan (BTC) neft kəməri üzrə tədarük edilir.
BTC-nin ümumi uzunluğu 1768 kilometrdir.
