Azərbaycan, Bakı, 4 iyun /Trend, müxbir E.İsmayılov/
Azərbaycanın "Şahdəniz" qaz-kondensat yatağında qaz hasilatının pik səviyyəsi ildə 30-35 milyard kubmetr olacaq. Trend-in məlumatına görə, bunu çərşənbə günü jurnalistlərə energetika naziri Natiq Əliyev deyib.
Nazir bildirib: "Hesab edirəm ki, "Şahdəniz"də hasilatın pik səviyyəsinin qiymətləndirilməsi bir az aşağı salınıb. Burada hasilatın pik göstəricisi ildə 25 milyard kubmetr deyil, 30 milyard kubmetr təşkil edəcək. Bəlkə də ildə 35 milyard kubmetr olacaq".
Qeyd edək ki, "Şahdəniz"in işlənməsinin ikinci mərhələsi çərçivəsində ildə 16 milyard kubmetr qaz hasil ediləcək, bu həcmdən 6 milyard kubmetri Türkiyəyə, 10 milyard kubmetri isə Avropaya tədarük ediləcək. Yatağın işlənməsinin I mərhələsi çərçivəsində hasilatın pik səviyyəsi ildə 9 milyard kubmetr qaz proqnozlaşdırılır.