Azərbaycan, Bakı, 15 avqust /Trend, müxbir Emil İsmayılov/
2014-cü ilin I yarısında Azərbaycanda BP-nin opretator qismində çıxış etdiyi layihələr çərçivəsində podrat işlərin və sifarişlərin yerinə yetirilməsində çəkilən xərclər 969 milyon dollar təşkil edib. 2013-cü ilin yanvar-iyun aylarında bu göstərici 1,02 milyard dollar olub. Trend-in məlumatına görə, bu barədə cümə günü BP-nin 2014-cü ilin I yarısında Azərbaycanda fəaliyyətinin nəticələri üzrə hesabatında deyilir.
Hesabata əsasən, kiçik və orta sahibkarların (fiziki şəxslər daxil olmaqla cəmi 180 ədəd) podrat işlərinə çəkilən xərclər 378 milyon dollar, dövlət şirkətlərinin (27 şirkət) podrat işlərinə 65 milyon dollar, yerli tərəfdaşı olan birgə müəssisələrin (13 birgə müəssisə) podrat işlərinə isə 240 milyon dollar xərclənib.
Xarici podratçıların daxili bazarda xərcləri hesabat dövründə 286 milyon dollar təşkil edib.
Yanvar-iyun aylarında sosial cavabdehlik çərçivəsində layihələrə 1,24 milyon dollar xərclənib. O cümlədən, Azərbaycanın "Azəri-Çıraq-Günəşli" yataqlar blokunun işlənməsi layihəsi çərçivəsində xərclər 0,19 milyon dollar, "Şahdəniz" qaz-kondensat yatağına 0,19 milyon dollar, Bakı-Tbilisi-Ceyhan və Bakı-Tbilisi-Ərzurum boru kəmərlərinə isə 0,4 milyon dollar xərclənib.
Qeyd edilən enerji layihələrinin iştirakçısı olan BP özünün sosial cavabdehlik layihələri çərçivəsində 0,46 milyon dollar xərcləyib.
