Azərbaycan, Bakı, 20 avqust /Trend, müxbir Emil İsmayılov/
Azərbaycan Respublikası Dövlət Neft Şirkəti (ARDNŞ) "Qaradağ" yeraltı qaz anbarında yeni qaz-kompressor stansiyası tikmək niyyətindədir. Bunu çərşənbə günü Trend-ə ARDNŞ-dəki mənbə deyib.
Onun sözlərinə görə, hazırda qaz anbarının iki qaz-kompressor stansiyası var: "Onların gücü, müvafiq olaraq, sutkada 2 və 10 milyon kubmetrdir".
Mənbə qeyd edib ki, sayca üçüncü qaz-kompressor stansiyasının tikintisi zərurətdir: "Bu, ilk növbədə, yüklənmə günlərində aqreqatların vaxtında dayandırılmasına və texniki baxışı həyata keçirməyə imkan verəcək. Yeni stansiyanın tikintisi, həmçinin qazın doldurulması və yığımına müsbət təsir edəcək".
Onun sözlərinə görə, stansiyanın tikintisi üçün yer artıq müəyyənləşib və ilkin məlumata əsasən, stansiyanın gücü sutkada minimum 3 milyon kubmetr qaz təşkil edəcək: "Lakin hər şey hələ seçilməyən avadanlıqdan asılı olacaq. Avadanlıqdan asılı olaraq, stansiyanın gücü sutkada 5 milyon kubmetr və daha çox ola bilər".
