Bakı. Trend:
17 iyul tarixində Yunanıstan-Bolqarıstan qaz interkonnektoru (IGB) layihəsinin müstəqil qaz nəqliyyat operatoru olan “Interconnector Greece-Bulgaria” (ICGB) şirkəti Komotini bölgəsində fövqəladə hallara reaksiya üzrə təlimlər keçirib.
Bu barədə Trend-ə şirkətdən məlumat verilib.
Təlimlərin əsas məqsədi Yunanıstan ərazisində IGB qaz kəmərinin qəza təmirinə cavabdeh olan podratçı təşkilatın hazırlıq səviyyəsini və effektivliyini qiymətləndirmək, ICGB-nin Yunanıstandakı operativ qruplarının fəaliyyətini yoxlamaq və müvafiq milli qurumlarla əlaqələndirmə protokollarını sınaqdan keçirmək olub.
Təlimlər zamanı şirkətin fövqəladə hallara reaksiya planına uyğun olaraq resursların səfərbər edilməsi, reaksiya sürəti və hadisə yerində fəaliyyətlərin əlaqələndirilməsinə xüsusi diqqət yetirilib.
Təlimlər Yunanıstanın Mülki Müdafiə sisteminə daxil olan qaz infrastrukturunda baş verə biləcək qəzalara qarşı ümumi reaksiya planı çərçivəsində yerli polis, yanğın-xilasetmə və mülki müdafiə bölmələri ilə sıx əməkdaşlıq şəraitində həyata keçirilib.
Əvvəlcədən hazırlanmış ssenariyə əsasən, dərhal müdaxilə tələb edən yerli hadisəni əhatə edən Tier 1 səviyyəli təlim məşqi keçirilib və mövcud prosedurların effektivliyi, təyin olunmuş qəza briqadasının fəaliyyəti qiymətləndirilib. Təlimlər zamanı xüsusi texnika və avadanlıqlardan istifadə olunub, bu da təlim sahəsi yaxınlığında müvəqqəti səs-küyün artmasına səbəb olub. ICGB bildirib ki, təhlükəsizlik protokollarına tam əməl edilməklə, nəzarət olunan şəraitdə keçirilən təlimlər zamanı əhalinin, ətraf mühitin və qaz infrastrukturunun bütövlüyünün təhlükə altına düşməsi halları müşahidə edilməyib.
Şirkət təlimlərin uğurla başa çatmasını özünün əməliyyat hazırlığının, iştirak edən komandaların əlaqələndirilmiş fəaliyyətinin və yüksək təhlükəsizlik standartlarına sadiqliyinin mühüm təsdiqi kimi qiymətləndirib. ICGB bu kimi təlimləri və məşqləri qaz kəmərinin həm Yunanıstan, həm də Bolqarıstan hissəsində mütəmadi şəkildə davam etdirəcək.
IGB qaz kəməri Yunanıstanın Komotini bölgəsində milli qaz nəqli sistemi (DESFA) və Trans-Adriatik Qaz Kəməri (TAP), Bolqarıstanda isə Stara-Zaqora bölgəsində Bolqarıstanın qaz nəqli sistemi (Bulgartransgaz EAD) ilə birləşir. Qaz kəmərinin ümumi uzunluğu 182 km, borunun diametri 32 düym, cari ötürücülük qabiliyyəti isə Yunanıstan–Bolqarıstan istiqamətində illik 3 milyard kubmetr təşkil edir. Bazar marağı və qonşu qaz nəqli sistemlərinin imkanlarından asılı olaraq IGB-nin ötürmə qabiliyyətinin ildə 5 milyard kubmetrə qədər artırılması nəzərdə tutulur.