...

The Bank of New York Dövlət Neft Fondunun depozitar xidmətlərin cəlb olunması məqsədilə keçirdiyi tenderin qalibi elan olunmuşdur

Energetika Materials 24 Yanvar 2006 18:52 (UTC +04:00)

Azərbaycan Respublikası Dövlət Neft Fondunun maliyyə təşkilatları tərəfindən göstərilən depozitar (kastodial) xidmətlərin cəlb edilməsi məqsədilə 2005-ci il sentyabrın 15-də elan etdiyi açıq tender başa çatmışdır. Trend xəbər verir ki, ABŞ-ın The Bank of New York bankı tenderin qalibi elan edilmişdir.

Depozitar xidmətlərin göstərilməsi şərtlərinin daha da təkmilləşdirilməsi barədə qərar iki amilə əsaslanaraq verilmişdir. Belə ki, Fondun idarəetmədə olan aktivlərinin sürətlə artımı depozitar xidmətlər üzrə xidmət haqlarının azaldılması üçün zəmin yaratmışdır. Bundan başqa, Fondun maliyyə əməliyyatları mürəkkəbləşdiyi üçün depositar xidmət göstərən maliyyə təşkilatının gələcək mərhələlərdə əlavə xidmətlər göstərməsinə tələbat yaranmışdır ki, bu da depositar xidmətlər üzrə hazırkı müqavilədə nəzərdə tutulmayıb.

Tender haqqında elanlar kütləvi informasiya vasitələrində dərc olunmuş, qlobal depositar xidmətlər göstərən və kredit reytinqi AA- və yaxud daha yüksək olan 16 maliyyə təşkilatına tenderdə iştiraka dair dəvətlər göndərilmişdir. 11 maliyyə institutu tenderdə iştirak etməkdə maraqlı olduqlarını bildirmiş və onlardan 8-i tender təkliflərini təqdim etmişdir.

Tenderdə iştirak etmiş maliyyə təşkilatları bunlardır: BNP Paribas, Citigroup Global Transaction Services, HSBC Bank Plc, JP Morgan Chase Bank, Royal Bank of Canada Global Services , Societe Generale Global Securities Services, State Street Bank GmbH, The Bank of New York.

The Bank of New York 4 əsas biznes seqmenti - Qiymətli Kağızlar, Xəzinədarlığın idarə olunması, İnvestisiya Menecmenti və Fərdi və regional bank xidmətləri üzrə işləyən maliyyə təşkilatıdır. Qlobal depozitar xidmətlər biznesi Qiymətli kağızlar seqmentinin bir hissəsidir. Hazırda 10 trilyon dollar məbləğində aktivlər üzrə kastodial xidmətləri həyata keçirən The Bank of New York dünyada qlobal depozitar xidmətlər göstərən ən böyük maliyyə institutlarından biridir.

Xəbər lenti

Xəbər lenti