Heydər Əliyev adına neft emalı zavodu (keçmiş "Azərneftyanacaq") planlı təmirə dayandırılmış katalitik krekinq qurğusunun işə salınmasına başlayır. ARDNŞ-dən Trend ə verilən məlumata görə, qurğunun martın 27-də işə salınacağı nəzərdə tutulur ki, bu da maye qaz istehsalının bərpasına və avtomobil yanacağı ixracının artırılmasına imkan verəcək.
Martın əvvəlində zavod müxtəlif müqavilələrə əsasən, avtomobil yanacağının Gürcüstana ixracını da bərpa edib. Qeyd edək ki, Azərbaycan Dövlət Neft şirkətinin artıq ehtiyatlarından istehsal olunan məhsul ixrac edilir.
2005-ci ilin dekabrında ARDNŞ Sinqapurun Petrofarm şirkəti ilə 2006-cı ildə 50 min ton avtomobil yanacağının tədarükü haqqında müqavlə imzalayıb. Petrofarm üçün neft məhsulu "Azərneftyag"ın (ARDNŞ-in balansına daxildir) balansında olan 20 saylı körpüdən yüklənəcək, Petrofarm benzini XDGİ-yə məxsus tankerlərlə İranın Neka limanınadək çatdıracaq.
ARDNŞ həm də Gürcüstanın "Saknaftobtransi" dövlət şirkəti ilə 2006-cı ildə avtomobtil yanacağının tədarükü haqqında müqavilə imzalayıb. Bu şirkətə ayda 20 min ton benzin tədarük olunması nəzərdə tutulur.