Aprelin sonunadək Azərbaycanda fəaliyyət göstərən beynəlxalq auditor şirkətləri Mədən Sənayesində Şəffaflıq Təşəbbüsü (EİTİ) çərçivəsində ikinci yarım il üzrə hesabatın hazırlanması ilə bağlı tenderdə iştirak etmək üçün öz təkliflərini təqdim etməlidir.
Azərbaycan Dövlət Neft Fondundan Trend ə verilən məlumata görə, birinci iclası keçirmiş seçkiqabağı qrupun qərarına əsasən, bu şirkətlərə dəvətnamə göndəriləcək.
Auditor seçildikdən sonra təyin olunan vaxtadək hesabatın hazırlanmasını başa çatdırmaq lazımdır. Hesabat neft və qaz sənayesində şirkətlərin və Azərbaycan hökumətinin daxilolmalara dair hesabatının tutuşdurulması əsasında hazırlanacaq.
Hər hesabat dövrü üzrə yeni tender keçirilir və auditor şirkəti EİTİ üzrə hökumət komissiyası, yerli və xarici neft şirkətləri və Mədən Sənayesində Şəffaflığın artırılması Koalisiyasının birgə iclasında təsdiqlənir.
2003 və 2004-cü illər ərzində auditlər Deloytte tərəfindən aparılıb, birinci yarım il üzrə hesabat isə Accountants Global Network qrupuna daxil olan AGN Mak Azerbaijan LTD tərəfindən hazırlanıb. Ardıcıllıq prinsipinə əsasən, auditor firmalarının xidmətlərini iki dəfə ARDNF, bir dəfə isə EİTİ-də iştirak edən şirkətlər ödəyib. Bu audit şirkətlər tərəfindən maliyyələşdiriləcək və hazırda ödəmə mexanizmi müzakirə edilir.
