Azərbaycan Dövlət Neft Şirkəti Şotlandiyanın Eurasia Energy Limited (keçmiş Pacific Alliance Ientures Ltd.) şirkətinə dəniz "Blok"u üzrə geoloji-geofiziki materialları təqdim edib. Bu barədə Trend ə ARDNŞ-dən məlumat verilib. Eurasia Energy layihənin iqtisadi nöqteyi-nəzərindən tərkib hissəsini qiymətləndirmək üçün materialların öyrənilməsinə başlayıb.
Dəniz "Blok"una "Ələt-Dəniz", "Hamamdağ-Dəniz", "Qarasu", "Səngi-Muğan", "Ülfət", "Aran-Dəniz", "Daşlı" və "Səbail" blokları daxildir. "Blok" Bakının təxminən 70 km-də dayaz sahil sularında yerləşir.
ARDNŞ və Eurasia Energy Limited arasında memorandum imzalanıb və şirkətə bu "Blok" üzrə danışıqlar aparmaq üçün müvəqqəti olaraq eksklüziv hüquqlar verilib.
Eurasia Energy Limited bu layihə çərçivəsində TRACS International Consultancy Ltd. şirkətini neft injinirinqi üzrə məsləhətçi qismində cəlb edib.
"Blok"da suyun dərinliyi 20 metrdir və strukturun sonuna səviyyə maksimal olaraq 50 metrə çatır. "Ələt-Dəniz" 1983-cü ildə açılıb və bu günədək buradan 12,5 mln. barel neft və 1 mlrd. m3 qaz hasil edilib. ARDNŞ-in məlumatına görə, "Ələt-Dəniz"də çıxarıla bilən neft ehtiyatları 14 mln. barel, qaz ehtiyatları isə 1 mlrd. m3 təşkil edir. Əsas məhsuldar horizontlar 3700-4500 metr dərinlikdə yerləşir.