ARDNŞ tərəfindən işlənlən yataqlarda qaz hasilatının artırılması çərçivəsində ilk növbədə "Günəşli" yatağında iş görmək planlaşdırılır. Qazın hasilat və verilmə sisteminin təkmilləşdirilməsi üçün əlavə tikinti işləri görmək və mövcud qaz quyularını istismara vermək ehtimal olunur. Bu barədə, Trend agentliyinin məlumatına əsasən, "Azneft" İB rəhbərinin müavini Ağasəf Əliyev "Xalq qəzeti"nə müsahibəsində bildirib.
Bündan əlavə, qaz hasilatının həcminin artırılması məqsədilə müasir texniki və texnoloji tədbirlərin görülsməsi, "8 mart" və "Bulla-Dəniz" qaz kondensatı yataqlarında yeni quyuların qazılması da nəzərdə tutulub.
2006-2015-ci illərdə "Güneşli" yatağından 22,3 mlrd. kub metr qaz hasil etmək ehtimal olunur. Hesablamalara görə, qalan iki yataqda cəmi 28,5 mlrd. kub metr qaz ehtiyatı var.
A.Əliyev deyib ki, yeni quyuların qazılmasının məqsədəuyğun olmasına baxmayaraq, bu işləri böyük dərinlikdə həyata keçirmək lazım gələcək. Lakin qazma avadanlığı köhnəlib və bu işlərin həyata keçirilməsinə maneçilik törədir. Buna görə yeni fəaliyyət proqramında xarici şirkətlərlə "8 mart" və "Bulla-Dəniz" yataqlarında müasir texnika və texnologiyaların, eləcə də qabaqcıl dünya təcrübəsinin tətbiqi sahəsində səmərəli əməkdaşlıq imkanı nəzərdən keçirilir.
İlkin hesablamalara görə, 2-3 il ərzində bu proqramın gerçəkləşdirilməsi üçün 250 - 300 mln. AZN tələb olunur. Bu proqrama mövcud infrastrukturun bərpası daxildir. Bu infrastruktur ARDNŞ-ə gələcəkdə müstəqil olaraq yeni yataqları işlətməyə imkan verəcək.
