"Şahdəniz" qaz-kondensat yatağının işlənmə layihəsinin operatoru BP Azərbaycan Cənubi Qafqaz qaz kəməri layihəsi çərçivəsində kəmərin Türkiyə ilə sərhədə qədər sınaq doldurulmasını başa çatdırıb. Bu barədə Trend ə şirkətdən məlumat verilib.
Hazırda boru kəmərinin Azərbaycandan gürcü-türk sərhədinə qədər bütün hissəsi tamamilə texniki qazla doludur. Qaz hasilatı üçün nəzərdə tutulmuş TPG 500 platformasında işə salma-sazlama işləri, demək olar ki, tamamlanıb. Şirkətdən bildirilib ki, ilk qazın tədarükü sentyabrın sonunda- oktyabrın əvvəlində başlayacaq.
TPG 500 platforması qazma, hasilat və 120 nəfərlik yaşayış blokundan ibarət özüqalxan qurğudur. Onun ümumi kütləsi 32 min tondur (üst tikililər 22 min ton, istinad və özüllər 10 min ton). Platformanın qazma avadanlığı 3 km-dən artıq kənara çıxma ilə 7 km-dən artıq uzunluq üzrə qazıntı işləri aparmağa imkan verir. Platformanın hasilat qurğusu gündə təxminən 1 milyard kub fut (28,5 milyon kub metr) qaz və 60 min barel (8 min ton) kondensat hasil etməyə imkan verir. Yataqdakı qaz və kondensat sualtı boru kəmərləri ilə Səngəçal terminalına nəql olunacaq.
