Azərbaycan Dövlət Neft Şirkətinin yeni Qaz əməliyyatları idarəsinin başçısı Kamal Abbasov təyin olunub. O, əvvəllər ARDNŞ-in marketinq və iqtisadi əməliyyatlar idarəsi yanında qaz departamentinin başçısı vəzifəsində çalışırdı. Bu barədə Trend ə Dövlət Neft Şirkətindən məlumat verilib.
Dövlət Neft Şirkətinin informatika və rabitə idarəsinin başçısı İnayət Hüseynov təyin olunub. O, əvvəllər "Azneft" istehsalat birliyinin Xəzər informasiya - hesablama mərkəzinin başçısı vəzifəsində çalışıb.
ARDNŞ-in ekologiya idarəsinin başçısı vəzifəsinə əvvəllər ekologiya sahəsində çalışan Soltan Əliyev təyin olunub.
Ekoloji idarənin yaradılması bu istiqamətin Dövlət Neft Şirkətinin fəaliyyətində üçtünlük təşkil etməsindən xəbər verir. Bu qurum ARDNŞ-in bütün ekoloji siyasətini aparacaq. Onun vəzifəsinə ekologiya sahəsində monitorinqdən başlamış böyük layihələrin reallaşdırılması və onların həyata keçirilməsi ilə bitən bütün məsələlər daxildir.
İnformasiya texnologiyaları və rabitə idarəsi ona görə lazımdır ki, ARDNŞ şirkətin ümumi informasiya texnologiyaları sistemini - mərkəzləşdirilmiş sistem yaratmaq niyyətindədir. Bu idarə bütün şirkətin informasiya texnologiyaları sahəsində siyasəti ilə məşğul olacaq.
Əvvəllər marketinq və iqtisadi əməliyyatlar idarəsinin nəzdində qaz departamenti mövcud idi. Hazırda onun bazasında ARDNŞ-in aldığı, satdığı və istehsal etdiyi bütün qaz, o cümlədən "Azəri"-"Çıraq"-"Günəşli", "Şahdəniz" yataqlarındakı qaz, Rusiyadan idxal olunan ARDNŞ-in öz qazı ilə məşğul olacaq qaz əməliyyatları idarəsi yaradılıb.