"Azəri"- "Çıraq"- "Günəşli" yataqlarının genişmiqyaslı işlənməsi çərçivəsində "Lay sularının idarə edilməsi və onların ləğvi" layihəsinin dəyəri 420 mln. ABŞ dolları təşkil edir. Trend xəbər verir ki, bu barədə BP-Azərbaycan şirkətinin bu layihə üzrə meneceri Harri Alan məlumat verib. Bu məbləğdən 50-60 mln. ABŞ dollarının Səngəçalda yerüstü obyektlərin qurulmasına, 130 mln. ABŞ dollarının - boru kəmərinin inşasına, qalan vəsaitlərin isə - avadanlığın alınması üçün sərf olunması nəzərdə tutulub. O qeyd edib ki, AÇG yataqlarında neft hasilatının artması ilə əlaqədar lay sularının həcmi də artacaq.
Neft hasil edilərkən orada su əmələ gəlir və bu su kənarlaşdırılmalıdır. Tərkibində olan az miqdarda üzvü maddə və çox duzluluq səbəbindən həmin su problemlər yarada bilər. Səngəçal neft terminalına göndərilməzdən əvvəl "AÇG" çərçivəsində obyektlərdə neftdən ayrılan suyun 95 %-i yenidən laylara vurulacaq. Suyun qalan 5 %-i isə Səngəçal neft terminalında ayrılacaq. Terminalda ayrılacaq su üçün "Lay sularının idarə edilməsi və ləğvi" layihəsinin gerçəkləşdirilməsi nəzərdə tutulub. Həmin layihə bu məsələni uzun müddətə həll etməyə imkan verəcək.
Bu layihə çərçivəsində "Mərkəzi Azəri"də suyun və qazın vurulması üçün platformaya qədər sualtı boru kəmərinin inşası nəzərdə tutulub. Bu boru kəməri ilə su yatağa çatdırılacaq və dənizdə ayrılmış su ilə birgə laylara vurulacaq.
