Azərbaycan Nazirlər Kabinetindən Trend ə verilən məlumata görə, İslam İnkişaf Bankının heyəti Mingəçevir SES-in rekonstruksiya layihəsinin qiymətləndirilməsi üçün dekabrın 4-də Bakıya səfər edəcək.
İlkin məlumatlara görə, layihənin ümumi dəyəri 95 mln. dollar qiymətləndirilir ki, İİB bu məbləğin 80 mln. dollarını ayrımağı planlaşdırır. Qalan məbləğ isə "Azərenerji" SC-nin vəsaitləri hesabına maliyyənləşə bilər.
Layihə çərçivəsində hər birinin layihə gücü 60 mVt. olan birinci və üçüncü hidroaqreqatların dəyişdirilməsi nəzərdə tutulur. 50-ci illərin əvvəllərindən işləyən köhnələrin yerinə isə gücü 70 mVt. olan hidroaqreqatların quraşdırılması planlaşdırılır. Bundan başqa, transformatorların, yarımstansiyaların dəyişdirilməsi, elektorostansiyanın idarəetmə sisteminin modernləşdirilməsi də nəzərdə tutulur.
1998-99-cu illərdə Mingəçevir SES-də görülən işlərin bir hissəsi İİB və Avropa Yenidənqurma və İnkişaf Bankının vəsati hesabına həyata keçirilmişdir. İİB tərəfindən 12,5 mln. dollar, AYİB tərəfindən isə 21 mln. dollar vəsait ayrılmışdı.
