Azərbaycan Dövlət Neft Şirkəti (ARDNŞ), Siemens və Target Petroleum tərəfindən yaradılan birgə müəssisənin (BM) iş proqramı hazırlanıb. Bu barədə Trend ə ARDNŞ-dən məlumat verilib. Təşkilatı məsələlər nizamlandıqdan sonra BM proqramın reallaşdırılmasına başlayacaq.
Müəssisə geniş spektrli məsələlərlə - bütöv bir yatağın işlənməsindən dənizdə platformaların təchizatının tamamlanması və yaxşılaşdırılmasına və quruda böyük işlərə - qaz-kompressor təsərrüfatının, elektrik təchizatının yaxşılaşdırılmasına qədər bütün işlərlə məşğul olacaq. BM həmçinin yatağın hasilatının artırılması üzrə işlərlə də məşğul ola bilər.
"BM-in böyük imkanları var, bu birgə müəssisənin nizamnaməsində onun məşğul ola biləcəyi böyük spektrli məsələlər var", - deyə ARDNŞ-dən bildirilib.
Yeraltı işlərə gəlincə, onlar ARDNŞ-in təcrübəsi və qərb texnologiyasından və Target petroleum şirkətinin maliyyə resurslarından istifadə etməklə həyata keçiriləcək, səthdəki avadanlığı Siemens tədarük edib quraşdıracaq.
İş üçün sifarişi ARDNŞ-in "Azneft" istehsalat birliyi həyata keçirəcək. Avadanlıq həm yeni, həm də mövcud platformalarda quraşdırılacaq. "Sifarişlərin alınması tamamlayıcı mərhələdədir", - deyə ARDNŞ-də qeyd olunub.