Avropa Yenidənqurma və İnkişaf Bankının məsləhətçisi - Allied Investment Company fevralın 23-də "Azərbaycan investisiya şirkəti" SC -nin Müşahidə Şurasının üzvləri üçün Azərbaycanda neft-kimya kompleksinin yaradılması layihəsinin ikinci mərhələsinin təqdimatını keçirməyi planlaşdırır.
AİŞ-in icraçı direktoru Anar Axundovun Trend ə verdiyi xəbərə görə, hesabatda Azərbaycanda belə kompleksin yaradılması perspektivlərinin analizi təqdim olunub.
İkinci mərhələdə məhsulun, həmin məhsulun istehsalı üçün istifadə olunacaq texnoloji proseslərin nomenklaturasının, investorlar və satıcılar dairəsinin ixtisaslaşmasının müəyyən olunması nəzərdə tutulub.
A.Axundovun sözlərinə görə, investorlar dairəsinin konkretləşdirilməsi və məhdudlaşdırılmasından sonra onlarla danışıqlara başlamaq olar. Yeni kompleksin yaradılması zonası strateji investorların təyin olunmasından sonra müəyyənləşdiriləcək.
Azərbaycanda neft-kimya kompleksinin yaradılması layihəsinin ilkin qiyməti 500 mln. ABŞ dolları həcmində dəyərləndirilib. Son qiymət artıq 2007-ci ilin mart ayında başlanması planlaşdırılan layihənin üçüncü fazasında müəyyən olunacaq.
Allied Investment Company birinci mərhələdə Azərbaycanda bu istehsalın səmərəliliyinin qiymətləndirilməsini həyata keçirib.
