Azərbaycan, Bakı/ Trend / Anshad Petrol birgə müəssisəsi (BM) və "Gobustan Operating Company" əməliyyat şirkəti 2007-ci ilin yanvar-mart aylarında Azərbaycan Dövlət Neft Şirkətinə 8,95 mln. kubmetr sərbəst qaz satıb ki, bu da ötən ilin müvafiq dövrü ilə müqayisədə 0.32 mln kubmetr aşağıdır. Bu barədə ARDNŞ-dən məlumat veriblər. ARDNŞ-dən verilən məlumata görə, 2007-ci ilin martında şirkətlər tərəfindən 3,01 mln. kubmetr qaz satılıb.
Sərbəst qazın ilkin satışına şirkət 2004-cü ildən 2 mln kubmetr həcmlə başlayıb. ARDNŞ qazı Anshad Petrol-dan 65 min AZM-lə ($13/1 min m3) alaraq, "Azəriqaz" QSC-yə satır. "Azəriqaz" QSC də öz növbəsində tərkibinə daxil olan "Aztransqaz" vasitəsilə qazın bölgüsünü həyata keçirir. GOC ARDNŞ-ə qazı $1.33/1 mln. BTU ($1.33/1 mln. BTU - $47,4/1 min m3) ilə satır.
Gobustan Operating Company (GOC) ARDNŞ-lə bağlanılmış PSA üzrə "Cənub-qərbi Qobustan" blokunun işlənilməsi ilə məşğuldur. Sərbəst qazın satışına bu şirkət bu ilin fevralından başlayıb. GOC-da 80 faiz iştirak payı Commonwealth Gobustan Limited-ə, 20 faiz isə ARDNŞ-ə məxsusdur. Commonwealth Gobustan Limited-in səhmlərinin 37,17 faizi Arawak Energy və 62,83 faizi China National Petroleum Company şirkətlər qurupuna məxsusdsur.
Anshad Petrol müqavilə əsasında "Neftçala", "Xillı" və "Babazənən" quyularından qaz hasil edir. Anshad Petrol BM 1993-cü ildə ARDNŞ və Atilla Dogan Petrol tərəfindən yaradılıb. 1994-1996-cı illərdə Anshad Petrol BM-in operatoru Atilla Dogan Petrol idi. 1997-ci ildə bu vəzifəni ARDNŞ öz üzərinə götürürb.
1995-ci ildə isə Malayziyanın Land and General Berhad şirkəti Atilla Dogan Petrol-dan 17,15 fazi alaraq iştirakçıya çevrilib.