Azərbaycan,Bakı/müxbir Trend S.Əliyev/Almaniyanın Wintershall və bir sıra digər xarici şirkətlər "Qarabağ" dəniz yatağının işlənməsinə maraq göstərir. Bu barədə çərşənbə axşamı Azərbaycan Dövlət Neft Şirkətindən (ADNŞ) məlumat verilib.
İlkin qiymətləndirmələrə görə, "Qarabağ" yatağında platformanın quraşdırılmasının dəyəri 80 mln. dollara başa gələcək. Platforma suyun 180 metr dərinliyində quraşdırıla bilər. Daha 100 mln. dollar qazma işi üçün lazımdır.
Bu yataqda ehtiyat həcmi ilkin olaraq 10 mln. ton neft və 6 mlrd. kub metr qaz həcmində qiymətləndirilib.
"Neftin hazırkı qiymətlərini nəzərə alaraq bu xərclər olduqca tez ödəniləcək", ADNŞ-də hesab edirlər. 2005-2006-cı illər üçün Azərbaycanın yanacaq-energetika kompleksinin inkişafı proqramına əsasən, 2008-ci ildə həmçinin pesrpektivli "Ümid" və "Babək" strukturlarında axtarış-kəşfiyyat işləri bərpa olunmalıdır. Bu yataqlar dənizin dərin hissəsində yerləşir. Proqrama əsasən, 2006-2008-ci illərdə kəşfiyyat işini başa vurmaq və "Əşrəfi" və "Qarabağ" yataqlarının sənaye işlənməsini hazırlamaq nəzərdə tutulur. 2008-ci ildən başlayaraq 2010-cu ilə qədər hər iki yataq işlənməyə cəlb olunmaladır.
