Azərbaycan,Bakı/müxbir Trend S.Əliyev/"Şahdəniz" yatağının texniki operatoru olan BP şirkəti yataqda quyuların istismara verilməsi qrafikini dəyişdirib. Bu barədə Azərbaycan hökumətindən məlumat verilib.
Mayın sonu-iyunun əvvəlində şirkət dördüncü qabaqlayıcı quyunu, sonra üçüncü quyunu istismara verəcək və qaz sızması baş vermiş birinci quyudakı işlərə qayıdacaq.
Qabaqlayıcı qazma proqramı çərçivəsində yataqda ümumilikdə dörd quyu qazılıb. Dekabrın 15-də birinci quyu istismara verilmiş, lakin qaz sızması nəticəsində quyuda iş dayandırılmışdı. Xüsusi məhlulun istifadəsi ilə problemin həll edilməsi cəhdləri uğurla nəticələnmədiyindən problemin həlli bu ilin payızına təyin olunub.
Hazırda quyuda qabaqlayıcı qazma proqramı çərçivəsində qazılmış ikinci quyu işləyir. Onun sutkalıq debiti 5,1 mln. kub metr qaz və 12 min barrel kondensatdır.
İkinci quyunun istismara verilməsindən sonra BP şirkəti üçüncü quyunun işə salınmasına başlayıb. Lakin hazırda yataqda quraşdırılmış və quyuların platformaya birləşdirilməsi və onların istismara verilməsi üçün istifadə olunan TPG-500 platformasının quyu qurğusu dördüncü quyuda yerləşdirilb.
"bp"dən qeyd olunduğu kimi, bu, hazırda üçüncü quyu buruğunun istifadəsini tələb etməyən quyuda işlərin aparılması ilə izah olunur. Vaxtdan daha effektiv istifadə olunması üçün o, dördüncü quyuya yerləşdirilib.
Yanvar-martda "Şahdəniz" qaz-kondensat yatağında 172,25 mln. kub metr qaz (proqnozdan 23 faiz çox) hasil olunub. Martda yataqda 115,34 mln. kub metr qaz hasil olunub.
"Şahdəniz"in işlənməsi üzrə layihənin "Mərhələ-1" çərçivəsində plato mərhələsində ildə 8,6 mlrd. kub metr qaz hasil olunacaq. 2007-ci ildə "Şahdəniz"dən 2,8 mlrd. kub metr qaz hasil olunacaq.