Azərbaycan, Bakı /müx. Trend S.Əliyev/ "Azərenerji" AC-nin mətbuat xidmətindən verilən məlumata görə, səhmdar cəmiyyətin texniki şurası yekdilliklə Əli Bayramlı İES-in bərpası layihəsini qəbul edib.
"Azərenerji" bərpa işlərindən sonra stansiyada yaradılacq prioritet gücü müəyyən edib. Elektrik stansiyasının gücü 800 MVt təşkil edəcək. Hazırda belə istehsal gücünə malik stansiya yalnız bir həftə ərzində işləyə bilir və köhnə avadanlıq üzündən bu göstərici xeyli aşağı düşür. 40 il bundan əvvəl tikilmiş elektrik stansiyasının layihə gücü 1000 MVt təşkil edir.
Hazırda stansiyada respublikanın elektrik enerjisinin 20%-i istehsal olunur, lakin istismar müddəti bitdiyinə görə, stansiyanın texniki-iqtisadi göstəriciləri xeyli aşağı düşüb.
"Azərenerji" AC elektrik stansiyasında tikiləcək qurğuların növünü müəyyən edib. Bu, mazut və qazla işləyə biləcək avadanlıq olacaq. Hazırda belə avadanlığa malik olan şirkətlərlə danışıqlar aparılır. Danışıqların bitdikdən sonra AC maliyyə mənbələrini miüəyyən edəcək.
Hazırda Azərbaycanda elektrik enerjisi istehsalının ümumi gücü 5500 MVt təşkil edir. Dörd il müddətində bu gücü 10000 MVt-a çatdırmaq nəzərdə tutulur. Bu, Azərbaycana özünü elektrik enerjisi ilə təmin etməyə və onu ixrac etməyə imkan verəcək.
