Azərbaycan, Bakı /müx. Trend K.Arınova / Azərbaycan Dövlət Neft Şirkəti (ARDNŞ) və Qazaxıstanın "KazMunayQaz" SC neft şirkətinin birgə bəyanatında bildirilir ki, şirkətlər neft-qaz sahəsində strateji əməkdaşlığa dair müqavilə və "Transxəzər" layihəsinin birgə reallaşması ilə bağlı Memorandum imzalayıblar. Sənədlər Azərbaycan prezidenti İlham Əliyevin Astanaya səfəri çərçivəsində imzalanıb.
İmzalanmış sənəd hər iki tərəfin neft-qaz sektorunda hər iki tərəf üçün səmərəli olan əməkdaşılığı davam etdirmək barədə, həmçinin Qazaxıstan neftinin nəqli və tranziti, neft emalı və neft-kimya, habelə ARDNŞ-ın neft-qaz infrastrukturunun birgə istifadəsi ilə bağlı müvafiq razılıqları qoruyub saxlamaq niyyətlərini elan edir.
Memorandum "Transxəzər" layihəsinin reallaşmasına doğru növbəti addımdır, bu Memorandumun baza şərtləri 2006-cı ilin iyun ayında Azərbaycan Respublikasının prezidenti İlham Əliyev və Qazaxıstan Respublikasının prezidenti Nursultan Nazarbayev arasında əldə olunmuş "Qazaxıstan Respublikasında ixrac olunan neftin Xəzər dənizi və Azərbaycan ərazisindən keçməklə "Bakı-Tbilisi-Ceyhan" kəməri ilə beynəlxalq bazarlara çatdırılmasına dair razılıq"la yaradılıb.
İmzalanmış Memoranduma əsasən, tərəflər "Transxəzər" layihəsini birgə həyata keçirməlidirlər, layihənin tərkibinə isə Xəzər dənizinin Qazaxıstan sahillərində neftboşaldan terminallar, tanker və gəmilər, Xəzər dənizinin Azərbaycan sahillərində nefttökən terminallar, "Bakı-Tbilisi-Ceyhan" sisteminə qədər birləşdirici qurğular daxildir.
"Transxəzər" sistemi Qazaxıstan neftinin Xəzər dənizi vasitəsilə nəqli sisteminin bir hissəsidir. Qazaxıstan neftinin Xəzər dənizi vasitəsilə nəqli sisteminin ilkin mərhələdə sutkada 500 min barrel ( il ərzində 23 mln. ton), gələcəkdə isə sutkada 750-1200 min barrelə qədər (il ərzində 35-56 mln. ton) neft ötürməyə imkan verəcəyi gözlənilir.
