Azərbaycan, Bakı/ Trend müxbir V.Şərifov/ Azərbaycan Dövlət Neft Şirkətinin (ARDNŞ) Geologiya və Geofizika İdarəsi sentyabrın sonunda "Gobustan Operating Company" (GOC) tərəfindən işlənilən "Cənub-qərbi Qobustan" müqavilə zonasında iki (2D) və üç dərəcəli (3D) seysmik kəşfiyyat işlərini başa çatdırmağı planlaşdırır. Bu barədə cümə günü layihəyə yaxın mənbə məlumat verib.
ARDNŞ-lə imzalanmış PSA müqaviləsi üzrə "Cənub-qərbi Qobustan"ın işlənməsi ilə GOC məşğuldur. "Gobustan Operating Company"-də 80% iştirak payı "Commonwealth Gobustan Limited" şirkətinə, 20% iştirak payı isə ARDNŞ-ə məxsusdur. "Commonwealth Gobustan Limited" şirkətinin 37,17 faizi Arawak Energy şirkətinə, 62,83 faizi isə "China National Petroleum" şirkətinə məxsusdur.
ARDNŞ artıq "Cənub-qərbi Qobustan" müqavilə zonasının "Sahilyanı" blokunda 3D seysmik kəşfiyyat işlərini başa çatdırıb. Hazırda "Mərkəzi" və "Şimal" bloklarında 2D kəşfiyyat işləri başa çatdırılır. İşlər 480 kv.km ərazidə aparılır.
ARDNŞ-in subpodratçı şirkəti qismində Rusiyanın seysmik kəşfiyyat üzrə "Tümenneftgeofizika" tresti çıxış edir.
Mənbə qeyd edib ki, seysmik kəşfiyyatın məlumatlarının interpretasiyası üçün artıq tender elan edilib və tenderin qalibi Çin şirkəti olub. Mənbə şirkətin adını açıqlamaqda çətinlik çəkib.
