Bakı. Trend:
Bu gün (20 iyun) hər il COP-dan öncə keçirilən “Sağlam
Gələcəklərin Proqnozlaşdırılması” Qlobal Sammitinin sonuncu günü
keçirilir.
Trend-in məlumatına görə, 3 gün davam edən sammitin məqsədi iqlim
dəyişikliyi və onun insan sağlamlığına təsirlərini müzakirə etmək
üçün iqlim və səhiyyə icmalarını bir araya toplamaq, eləcə də,
“məlumatlılıqdan fəaliyyətə” birlikdə hərəkət etmək imkanları və
strategiyalarını müəyyən etməkdir.
Tədbirin sonuncu günündə Azərbaycan Respublikasının Səhiyyə
nazirinin müavini Dr. Nadir Zeynalov iqlim və insan sağlamlığı
mövzusunda çıxış edəcək. Eləcə də COP26, COP27, COP28 və COP29
təmsilçiləri arasında COP Davamlılıq Dialoqu baş tutacaq. Həmçinin,
iqlim və sağlamlığın kəsişməsində yerləşən ən önəmli məsələlərə
dair COP məsləhətçi dəyirmi masaları keçirililəcək.
Xatırladaq ki, dünən, tədbirin ikinci günündə ÜST-nin İqlim və
Sağlamlıq Elçisi Vanessa Kerri, dünyada səhiyyə sahəsində ən böyük
donor olan Qlobal Fondun icraçı direktoru Peter Sands, Dünya
Bankının Sağlamlıq, Qidalanma və Əhali üzrə Qlobal Direktoru Juan
Pablo Uribe, COP29 Məsləhət Şurasının üzvü, Malavinin keçmiş
prezident Coys Banda, “Malyariya son” təşkilatının baş direktoru
Martin Edlund, Dünya Bankının İqlim və Sağlamlıq üzrə Qlobal
Proqram Rəhbəri Tamer Rabie və digər məruzəçilər çıxış edib.
Qeyd edək ki, sammit səhiyyə, iqlim və inkişaf sahələri üzrə qlobal
liderləri bir araya gətirir və ötən COP28 çərçivəsində Abu Dabidə
baş tutmuş sammitin uğuruna əsaslanır. “Sağlamlıq Günü”nü COP28
gündəliyinin ayrılmaz hissəsi kimi rəsmi olaraq ilk dəfə ötən il
Abu Dabidəki sammitdə elan edilmişdi. Builki Qlobal Sammit özəl
sektordan, QHT-lərdən, qlobal maliyyə institutlarından və ali
təhsildən 200 təşkilatı və 44-dən çox ölkəni təmsil edən 270-ə
yaxın liderdən ibarət müxtəlif qrupları bir araya gətirib.
2020-ci ildə iqlim dəyişikliyi və onun insan sağlamlığı üzərində
yaratdığı pronlemlərə yeni həll yollarının tapılmasını
sürətləndirmək üçün fəaləyiyyətə başlayan “Sağlam Gələcəklərin
Proqnozlaşdırılması” təşəbbüsü, dünya miqyasında ən həssas icmalara
diqqət yetirməklə, iqlim dəyişikliyi kontekstində qlobal sağlamlıq
qazanclarını qorumağa və genişləndirməyə çalışır.
