Azərbaycan, Bakı / Trend , müxbir S.Babayeva/ 2008-ci ildə Azərbaycan hökuməti, "Azərpoçt" Dövlət Müəssisəsinin poçt şəbəkəsinin genişləndirilməsi və universal xidmətlər göstərilməsi üzrə layihə çərçivəsində, 8 mln. manat vəsait ayıracaq. Bu barədə çərşənbə axşamı Azərbaycanın Rabitə və İnformasiya Texnologiyaları Nazirliyinin Poçt bölməsinin rəhbəri Novruz Məmmədov məlumat verib. Layihənin ümumi dəyəri 11 mln. dollar təşkil edir.
Onun sözlərinə görə, bu il layihənin həyata keçirilməsinə dövlət müəssisəsindən 1,5 mln. manat vəsait ayrılıb.
Layihənin əsas məqsədi dövlət müəssisəsi şəbəkəsinin genişləndirilməsi, yeni poçt şöbələrinin açılması və poçt agentliklərinin yaradılması, onlar üçün binaların tikilməsi, nəqliyyat parkının yenilənməsi, çoxmərtəbəli binalarda poçt abunəsi qutularının quraşdırılmasıdır.
Məmmədov hesab edir ki, layihənin həyata keçirilməsi poçt sahəsində boşluq və problemlərin həllinə müsbət təsir göstərəcək.
Azərpoçt DM-in tərkibinə 59 poçtampt, 2 poçt müəssisəsi, 2 törəmə müəssisə və 8 rabitə qovşağı daxildir. Ölkənin bütün əhali yaşayan məntəqələrini əhatə edən DM-in tərkibinə 1364-dən çox poçt şöbəsi daxildir. DM-in müəssisələrində 4,2 mindən çox əməkdaş işləyir.
