Azərbaycan, Bakı, 19 mart / Trend , müxbir S.Babayeva / "Xalq kompüteri" layihəsi üzrə İşçi qrupun növbəti iclası aprel ayının sonlarına nəzərdə tutulub. Bu barədə Rabitə və İnformasiya Texnologiyaları Nazirliyinin mətbuat xidmətindən məlumat verilib.
Nazirlikdə layihəni gerçəkləşdirmək məqsədilə bir sıra nazirlik , "İntel" və "Microsoft" şirkətlərinin mütəxəssislərindən ibarət xüsusi İşçi qrup yaradılıb.
İşçi qrupun mart ayının14-də keçirilmiş son görüşündə "Microsoft" və "Intel" şirkətləri layihənin gerçəkləşdirilməsi üçün hazırladıqları ilkin qiymətləndirmələri nəzərdən keçirilməsi məqsədilə təqdim ediblər. Azərbaycan tərəfi həmçinin layihənin gerçəkləşdirilməsi mexanizmini də təqdim edib.
Tərəflər iclasda təqdim olunmuş təkliflərin bir ay ərzində nəzərdən keçiriləcəyi barədə razılığa gəliblər.
"Təkliflərin yekunlarının İşçi qrupun aprel ayında keçiriləcək görüşündə müzakirə olunacağı planlaşdırılıb" - deyə Rabitə Nazirliyindən məlumat verilib.
"Xalq kompüteri" layihəsinin məqsədi aztəminatlı əhali təbəqəsinə aşağı faizlərlə uzunmüddətli kreditlərlə kompüter təqdim edilməsidir.
Layihə çərçivəsində "Microsoft" lisenziyalı proqram, "İntel" isə güzəştli əsaslarla avadanlıq təminatı təqdim edəcək.
Layihə üç il müddətinə nəzərdə tutulub, amma bəzi düzəlişlər də istisna deyil. Layihənin ümumi dəyəri hələ təyin edilməyib.
Aztəminatlı əhali təbəqəsinə təqdim olunmaq üçün pilot qismində 10 min kompüter alınması nəzərdə tutulub. İlkin mərhələdə kompüterlərin müəllim və tələbələrə təqdim edilmə variantları nəzərdən keçirilir.
Rabitə Nazirliyinin təxmini hesablamalarına görə, hazırda Azərbaycanda hər 100 nəfərə dörd-beş kompüter düşür. "Xalq kompüteri" layihəsi uğurlu rellaşdırıldığı təqdirdə, bu rəqəmi beş dəfədən artıq çoxaltmaq mümkün olacaq.