Azərbaycan, Bakı, 30 iyul/ Trend , müxbir S.Babayeva/ Azərbaycanın Rabitə və İnformasiya Texnologiyaları Nazirliyi milli rabitə peyki - AzerSat-ın buraxılması layihəsinin reallaşdırılması üçün iki şirkətin təkliflərini münasib hesab edir. Bu barədə çərşənbə günü Rabitə Nazirliyinin dövlət müəssisələrinin fəaliyyətinin koordinasiyası şöbəsinin baş məsləhətçisi Qulam Abdullayev məlumat verib.
"Çoxsaylı təkliflər daxil olub. Lakin bu gün onlardan yalnız ikisi bizim üçün münasibdir", - o bildirib. Bunlar Amerikanın Orbital və Türkiyənin Turksat şirkətləridir.
Abdullayevin sözlərinə görə, bu hələ həmin şirkətlərlə müqavilənin bağlanacağı demək deyil.
"Bu asan məsələ deyil. Hər şey bütün təfərrüatlarıyla müzakirə olunmalıdır", - Rabitə Nazirliyinin mütəxəssisi hesab edir.
Peykin hazırlanması və buraxılmasına dair müqavilələr ilin sonunadək hökumət tərəfindən nəzərdən keçirildikdən sonra imzalanacaq.
AzerSat layihəsinin dəyəri $80-100 mln. qiymətləndirilir. Peyk hazırlandıqdan sonra Qazaxıstandakı Baykonurdan orbitə çıxarılacaq. Peykin əhatə dairəsinə təxminən Avropa və Asiyanın bir hissəsi - Qazaxıstan, Türkmənistan, İran daxil olacaq.
Nazirlikdən hesab edirlər ki, peyk 2010 - cu ildə buraxıla bilər. AzerSat-ın istismar müddəti 20 ildir.
