Azərbaycan, Bakı, 21 oktyabr / Trend , müxbir S.Babayeva/ Azərbaycanın İnformasiya-Kommunikasiya Texnologiyalarının (İKT) İnkişafı naminə İnsan Resursları Fondunda bir ay ərzində informasiya texnologiyaları sahəsində təhsillərini davam etdirmək üçün xarici ölkələrə göndəriləcək tələbələrlə görüşlər keçiriləcək, ölkənin Rabitə və İnformasiya Texnologiyaları Nazirliyindən bildiriblər.
"Tələbələrin bilik, dünyagörüşü səviyyələrini öyrənmək məqsədilə onlarla söhbət edəcək, müsahibə aparacağıq", - idarədən bildiriblər.
Ay ərzində fond təxminən 20 nəfəri qeydiyyata alıb. Onlara aşağıdakı tələblər irəli sürülüb - Azərbaycan vətəndaşlığının olması və ingilis dilini mükəmməl bilmək. Bundan əlavə, iddiaçı Tələbə Qəbulu üzrə Dövlət Komissiyasının ali məktəblərə qəbul imthanları zamanı 550-dən çox bal toplamalıdır.
Fondda qeyd edirlər ki, ölkədə tələbələrin xaricdə təhsil alması üçün vahid maliyyələşdirmə sistemi yoxdur. Lakin müsahibə zamanı fondun tərkibinə daxil olan özəl şirkətlərdən istənilən biri bu və ya digər tələbənin maliyyələşdirilməsini öz üzərinə götürə bilər.
Azərbaycanın İKT-nin İnkişafı naminə İnsan Resursları Fondunun tərkibinə ölkənin 11 İT-şirkəti - Azercell Telecom, Bakcell, AzEuroTel, Caspian American Telecommunication, Delta Telecom , Azerfon, Azel, Sinam, R.İ.S.K, Ultra, Microsoft Azerbaijan və Azərbaycanın Gənclər Təşkilatları Milli Şurası daxildir.
Fond tələbələrə xaricdə təhsil almaq üçün maliyyə yardımının təqdim edilməsi məqsədilə yaradılıb. Bu dəstək həm də fondun vəsaitləri hesabına həyata keçirilir. Onun maliyyə mənbələri həm özəl şirkətlər, həm də Rabitə Nazirliyidir. Fondun sədri Azərbaycanın rabitə və informasiya texnologiyaları naziri Əli Abbasovdur.
Müəlliflə əlaqə saxlamaq üçün elektron ünvan: [email protected]
