Azərbaycan, Bakı, 22 oktyabr/ Trend , müxbir S.Babayeva/ "Gələn il Azərbaycanın rabitə və informasiya texnologiyaları sahəsinin inkişafında əsas il olacaq", - ölkənin rabitə və informasiya texnologiyaları nazirinin müavini İltimas Məmmədov çərşənbə günü bildirib.
"2009-cu il yalnız rabitəçilər deyil, bütün ölkə üçün vacib olacaq. Bu ildə Azərbaycanda Elektron Hökumətin yaradılmasına başlanılacaq", - Məmmədov bildirib.
Onun sözlərinə görə, gələn il 2009 -2012 - ci illərdə ölkədə rabitə və informasiya - kommunikasiya texnologiyalarının inkişafı üzrə "Elektron Azərbaycan" ikinci Dövlət Proqramının təsdiq ediləcəyi gözlənilir. Azərbaycanda rabitə və informasiya texnologiyalarının inkişafı üzrə birinci Dövlət Proqramı ("Elektron Azərbaycan") 2005-ci ilin oktyabrında təsdiq olunub və 2005- 2008 - ci illəri əhatə edir.
"2008 - ci ilədək bizim üçün telefonlaşdırma və infrastrukturun yaradılması prioritet idisə, qarşıdakı dövrdə "E-Hökumət" çərçivəsində, artıq mövcud texniki imkanlar bazasında müasir xidmətlərin tətbiqi ön plana keçib", - Məmmədov bildirib.
Dövlət Proqramı rabitə və informasiya texnologiyaları sahəsində iqtisadi - struktur islahatlarının, yeniləşdirmənin aparılmasına, informasiya cəmiyyətinə keçid üzrə layihələrin hazırlanması və realizəsinə yönəlib.
"Elektron Azərbaycan" Dövlət Proqramının realizəsi üzrə planlara liberallaşdırma, tənzimləmə, texniki yeniləşdirmə, tele- radioyayımın təkmilləşdirilməsi, poçt sahəsində islahatlar, informasiya cəmiyyətinə keçid üzrə proqramlar daxildir.
Müəlliflə əlaqə saxlamaq üçün elektron ünvan: [email protected]
