Azərbaycan, Bakı, 13 may / Trend /
Business Software Alliance-ın (BSA) International Data Corporation-ın (IDC) 2008-ci il üçün yekun tədqiqatları əsasında tərtib etdiyi illik hesabatına əsasən, 2007-ci ildə dünyada piratçılıq üzrə üçüncü pillədə olan Azərbaycan, 2008-ci ildə altıncı pilləyə enib.
Tədqiqatlar göstərir ki, son üç il ərzində Azərbaycanda orta hesabla hər il iki faiz azalma müşahidə olunur. 2008-ci ildə bu rəqəm 90 faiz təşkil edib.
Tədqiq edilmiş 110 ölkə arasında Gürcüstan birinci yeri tutur (95 faiz). İkinci Banqladeş (92 faiz), üçüncü Ermənistandır (92 faiz). MDB ölkələri arasında piratçılıq səviyyəsi Moldovada 90 faiz, Ukraynada 84 faiz, Qazaxıstanda 78 faizdir. Ən yaxşı göstəricilər isə ABŞ (20 faiz), Yaponiya (21 faiz) və Lüksemburqdadır (21 faiz). Dünyada piratçılığın ümumi səviyyəsi 41 faiz təşkil edir. Lisenziyasız məhsullardan istifadəyə görə vurulan zərər 53 milyard dollar həcmində qiymətləndirilir.
