Azərbaycan, Bakı, 05 oktyabr / Trend , müxbir H.Vəliyev/
Azərbaycan milli pavilyonunda Beynəlxalq ITU Telecom World 2009 sərgisində Dilmanc maşın tərcüməçisinin mobil versiyası nümayiş etdirilib. Bu barədə bazar ertəsi proqramı hazırlayan şirkət tərəfindən yayılan məlumatda deyilir.
Sistemdəki yenilik telefon tərcüməsinin olmasıdır. Bu da həmsöhbətlə interaktiv tərcüməni həyata keçirməyə imkan verir.
Maşın tərcüməçisində üç modul fəaliyyət göstərir: nitqin müəyyən edilməsi, maşın tərcüməsi və mətnin səsləndirilməsi sistemləri.
Dilmanc layihəsinin başçısı Əbülfət Fətullayevin sözlərinə görə, sistem 130 min söz və sözbirləşməsini tanıya bilir. Sistemdə Acoustic və Language modullarından istifadə edilib. Language 150 milyon sözdən ibarətdir. Acoustic modulu isə 50 saatlıq danışıq korpusunda hazırlanıb. Sistemin yaradılmasında 1500 spikerin səsindən istifadə edilib.
Sistem mikrofon vasitəsilə mətnin daxil edilməsi üçün əlverişlidir. Dil filtri danışığı Windows mühitində istənilən redaktorda danışıq nitqini mətnə çevirə bilir.
Hazırda elektron növündə böyük cümlələrin tərcümə sürəti 15-16 saniyə təşkil edir. Gələcəkdə sistemin təkmilləşdirilməsi tədbirləri nəticəsində bu göstərici yaxşılaşacaq. Sistemin Beta versiyasını http://www.dilmanc.az saytından əldə etmək olar.
Beynəlxalq Telekommunikasiya İttifaqının ITU Telecom World 2009 sərgisi bu gün Cenevrədə öz işinə başlayıb və oktyabrın 9-dək davam edəcək. Sərgi "Açıq şəbəkələr - birləşmiş ağıllar" şüarı altında keçirilir. Azərbaycanın sərgidəki nümayəndə heyətinə rabitə və informasiya texnologiyaları naziri Əli Abbasov başçılıq edir.
Sərginin işində təxminən 40 ölkədən 25 milli pavilyon da daxil olmaqla 700 şirkət iştirak edir. 140 ölkədən olan peşəkar qonaqların sayı 40 min nəfərdən çoxdur. Onlar arasında təxminən 150 ölkədən 1000 VIP qonaq (nazirlər, nazirlik nümayəndələri, səfirlər, baş direktorlar, icraçı direktorlar) yer alır.
Məqalə müəllifi ilə əlaqə ünvanı: [email protected]
