Azərbaycan, Bakı, 18 yanvar / Trend , müxbir H.Vəliyev/
İndoneziyanın kommunikasiya və informasiya texnologiyaları naziri Tifatul Sembirinq Azərbaycana səfər edəcək. Bu barədə Azərbaycanın Rabitə və İnformasiya Texnologiyaları Nazirliyindən Trend -a məlumat verilib.
Sembirinq səfəri çərçivəsində azərbaycanlı həmkarı ilə informasiya-kommunikasiya texnologiyaları (İKT) sahəsində əməkdaşlıq məsələlərini müzakirə edəcək. Hazırda Azərbaycanın İndoneziyadakı səfirliyi tərəfindən İKT sahəsində əməkdaşlıq haqqında saziş layihəsi baxılması üçün İndoneziyanın rabitə nazirliyinə təqdim edilib.
Nazir Sembirinq, Azərbaycanın geostrateji mövqeyini, "Şərq-Qərb" informasiya supermagistralının yaradılması layihəsi üzrə Azərbaycanın BMT-nin baş assambleyasında qəbul edilən qətnaməsini, respublikanın Azerspace telekommunikasiya peykinin buraxılması planlarını yüksək qiymətləndirib və Azərbaycana səfəri zamanı göstərilən sahələrdə əməkdaşlıq perspektivlərini müzakirə etməyə hazır olduğunu bildirib.
Hazırda Azərbaycanın qarşısında duran əsas məsələlərdən biri də Azərspace resurslarının beynəlxalq bazara çıxarılmasıdır. Əvvəllər məlumat verimişdi ki, RİTN hazırda peykin resurslarının 40%-nin reallaşdırılması ilə əlaqədar olaraq bir sıra ölkələrlə danışıqlar aparır. RİTN ümumilikdə, Azərspace peykinin resurslarının 80%-ni dünya bazarlarına çıxarmaq niyyətindədir. Qalan 20% isə respublikadaxili səviyyədə istifadə ediləcək.
Layihə Azərbaycan üçün iqtisadi səmərəli olacaq və qoyulan investisiya 5-7 il ərzində çıxarılacaq. Bundan sonra isə peyk 100% gəlirli olacaq.
Beynəlxalq Elektrorabitə İttifaqı Azərbaycanı rabitə və informasiya texnologiyaları sahəsində nailiyyətləri olan ölkə kimi tanıyır. Bu təşkilatın şərtlərinə əsasən, əgər Azərbaycan peykin buraxılmasını yaxın 5 il ərzində həyata keçirməsə, Azərbaycana ayrılan mövqe geri alına bilər. Lakin buna cavab olaraq, respublika göstərilən dövr ərzində iki peyk buraxmağa hazırdır. Birinci peykin buraxılması 2011-ci ilə, ikinci peykin buraxılması isə 2012-ci ilə planlaşdırılıb.
Məqalə müəllifi ilə əlaqə ünvanı: [email protected]