Azərbaycan, Bakı, 19 aprel /Trend, müxbir H.Vəliyev/
Azərbaycanın dövlət internet-servis provayderlər şəbəkəsində genişzolaqlı internet istifadəçilərinin sayı 76 min abonentdən çoxdur. Bu barədə Azərbaycan Rabitə və İnformasiya Texnologiyaları Nazirliyinin məlumatında bildirilir. Məlumata görə, "Aztelekom" İstehsalat Birliyinin şəbəkəsində olan genişzolaqlı rabitə portlarının sayı 5 032 ədəddir ki, bunun da 2538-i fəaliyyət göstərir.
Hazırda "Aztelekom" İstehsalat Birliyinin (AzTelekomNet dövlət internet provayderi) genişzolaqlı internet xidmətlərindən respublikanın 51 şəhərində istifadə olunur.
Bakı Telefon Rabitəsi İstehsalat Birliyinin ATS-də fəaliyyət göstərən ADSL, ASAM avadanlıqlarının montaj tutumu 13 400 porta kimi artırılaraq 38 766 ədəd təşkil edib. Portların ümumi sayından 17 518 port istismara verilib.
Hazırda İstehsalat Birliyinin şəbəkəsində olan genişzolaqlı internet portlarının (operator ATS-də öz DSLAM avadanlığını qurmuş kənar provayder istifadəçiləri nəzərə alınmaqla) sayı 49 390 ədəd təşkil edir.