Azərbaycan, Bakı, 30 aprel /Trend, müxbir H.Vəliyev/
Microsoft-un Azərbaycan nümayəndəliyi "Microsoft IT Academy" proqramının həyata keçirilməsinə başlayır. Bu barədə Trend-ə "Microsoft Azerbaijan" nümayəndəliyinin rəhbəri Teymur Axundov məlumat verib.
Axundovun sözlərinə görə, hazırda bəzi ali məktəblər seçilib ki, onlar Microsoft-un bu təşəbbüsləri çərçivəsində təqdim olunan tələblərə cavab verir.
"IT Academy" layihəsi bizim üçün çox maraqlıdır, belə ki, bu, real mexanizmdir və tələbələrə müasir texnologiyaların öyrənilməsi üçün şans verir. Lakin bu layihə çərçivəsində İT akademiya olmaq istəyən təşkilat müəyyən sayda tələbləri yerinə yetirməlidir. Microsoft-un istəyi tədrisin ən yüksək səvyyədə keçməsidir", - Axundov deyib.
Təhsil Nazirliyi ilə birgə həyata keçiriləcək proqram ali və orta məktəblər üçün hazırlanıb və təhsil alanların sertifikatlaşdırılmış Microsoft imtahanlarını verməyə hazırlaşmasını nəzərdə tutur. Tədrisin sonunda hər tələbəyə dünya səviyyəsində sertifikatların alınması üçün sertifikatlaşdırılmış imtahandan keçmək haqqında diplom verilir.
İlkin mərhələdə Microsoft "IT Academy" proqramını Zərifə Əliyeva adına məktəbdə, 7 saylı məktəbdə, Avropa liseyində, həmçinin Texniki Universitetdə və Bakı Dövlət Universitetində həyata keçirməyi planlaşdırır.
"Microsoft IT Academy" çərçivəsində ali məktəblər üçün iki iştirak səviyyəsi təklif olunur - Microsoft Office Specialist və IT Professional. IT Professional səviyyəsində stolüstü və portativ kompüterlərə texniki dəstək üzrə mütəxəssislərin peşəkar hazırlanması, kompüter sistemləri, şəbəkə və baza məlumatları inzibatçılığı, əlavələrin və baza məlumatlarının hazırlanması, Microsoft Office Specialist səviyyəsi isə orta məktəblər üçün nəzərdə tutulub. Bu kurslar çərçivəsində Microsoft Office-in istifadəçi əlavələrinin öyrənilməsi ilə yanaşı, biznes sənədlərinin (CV, anketlər, ərizələr və s.) tərtib edilməsi sahəsində tədris aparılır.
